華麗耆素 (Closed)

雖然我本身唔係一個素食者，但只要係美食都好願意去食吓～朋友就帶我去喱間隱世素食店，既係社企又只開午市，位置仲起山上面一樣（因為真係要行一段路），走入工廠區有一種探險感覺，同埋真係唔會諗到入面有餐廳，門口係湖水綠，份外醒神！入面雖然無咩華麗裝修，但因為側邊兩排窗，仲要係對住山，所以好光猛，自然光俾人感覺都好舒服。午餐選擇好多，揀了蒜香韓式石鍋飯($78)同印度咖哩雜菜($60)，石鍋飯一上枱炸炸聲～熱辣辣！d肉碎係用新豬肉代替，無論口感同外型都同豬肉碎好似，真係幾可亂真！個辣醬係微辣～朋友唔食得辣都食得到！而聽講佢地都用有機菜，咁叫咖哩雜菜實無錯！入面有最愛嘅茄子！仲有啲椒、瓜同薯仔，咖哩味夠濃，一樣唔會太辣～除此之外，哩道有免費自助素湯任飲！今日係「西洋菜粟米南北杏羅漢果蜜棗湯」，原來素湯係好清甜咖！我地都係咁添飲～店員伯伯好搞笑～不停叫我地飲多d同食埋d湯渣～話好有益，得閒個陣又嚟問下我地岩唔岩～味道雖然唔係誇張到一鳴驚人，但係無論食物定服務態度，都有家嘅感覺（仲要係媽媽拿手菜個種～）～同埋店員們真係好親切！