韋醬爺車仔麵

鐘意食車仔麵10幾廿年，經常專登搭車出去就係為左一碗車仔麵，今次經朋友介紹食呢間，完全因為我比面朋友+自己住附近，之前上網睇，見到唔少負評講份量少及對客無禮貌，但我今日堂食，坐左大半個鐘，1男（相信係老闆，同店內明星相合照果位）+2位女姐姐都好有禮貌喎，就萛佢地員工之間溝通都前後唔該，想幫下小店平反。

講番碗麵，叫左油麵、牛筋腩、豬紅（4粒）、魚肉條（4條）、韮菜餃（2粒）+小辣汁/凍奶茶。牛筋腩好淋入味，豬紅都好正，男老闆話魚肉條純用魚肉做，無溝粉，唔知係咪咁，所以得4條（係咪叫貴精不貴多）我平時一般食3餸麵，今日第一次試新店，揀左4餸，老實講，雖然比起我平時食其他舖，呢間份量唔萛勁大碗果隻，但其實覺得唔夠飽咪叫多1-2個餸，食品質素好味都好重要既，衣家租金、薪金、食材樣樣都貴，希望老闆睇到呢段評語都可以考慮下加多少許份量吸客啦，附近咁多工廠寫字樓，希望小店繼續用心經營，d野食真係好味，因為沙田/火炭區真係好耐無一間車仔麵檔，要好食既更加無，我會繼續幫襯你啊

油麵、豬紅、牛筋腩、韮菜餃、魚肉條、少辣汁

$59

食清光