原本打算平安夜同朋友們順道嚟灣仔呢間食宵夜，點知晚上十一點去到原來關咗門，
是晚同3位朋友再嚟呢間食晚餐。
一入到去就見到好多舊玩具間隔兩邊，牆上仲有大大幅康樂棋畫，極有懷舊時光。
呢間同西營盤分店有咩唔同？
最大分別係呢度多咗好多小菜食，所以今次我哋主要都係叫小菜同飯～
至於懷舊飲品同茶餐廳小食，呢度都有供應。
先嚟蒜蓉炒雜菜，雜菜有聖瓜、西蘭花、苦瓜同菜心，炒得幾爽口，連苦瓜都有得食，食落唔苦，估唔到大家最搶手食晒嘅係苦瓜～HAHAHA
蟲草蒸雞，侍應話呢個SET晚餐係2星期先有一次，肉頗滑，啲汁用嚟送飯好味道！
蒸鯇魚腩餐，魚頗滑，加埋甜豉油送飯亦一流，傾下計食下魚，食下食下KO晒成條魚喇XD
咖喱牛脷撈麵，我麻麻地牛，如果餐牌有咖喱魚柳撈腩就好喇！
我不嬲都欣賞金記嘅咖喱汁，依舊係少少辣好惹味，以前食咖喱飯／農夫包多，不過一樣嘅汁，改撈公仔麵卻略嫌濃咗啲，如果溝稀少少無咁「漏／結」更加好，都係掛住咖喱農夫包多D～ 哈哈
茶餐廳嚟講，食物算係好唔錯，支持金記！
