品粵居 (Closed)

最近會展多搞作，所以我都多咗出灣仔搵食，今次試咗一間茶樓，有齊傳統同新派點心，賣相仲好精緻好呃like👍🏻👍🏻最驚喜係響鈴鮮蝦腸粉，冇諗過賣相咁似花之戀壽司🤣紫色腸粉包住脆卜卜嘅響鈴碎同蝦，仲有少少蟹籽點綴，入口外軟內脆又彈牙，係天花板級炸兩，好好食！而西湖蟹肉餃賣相都好精緻，似腐皮壽司🤣餡料除咗有蟹肉，仲有紅蘿蔔、芹菜，入口清新，都係茶樓比較少見嘅點心款式！另一個呃like之選係啤梨形咸水角，連個蒂都係用芋頭做，成舊都食得！味道同傳統咸水角一樣咁香口蝦餃表面睇雖然好傳統，但細心睇條邊係用金箔做成嘅金邊，相當奢華！入口皮薄餡靚，蝦肉都好足料。店員仲推介我地要食叉燒包，賣相雖然傳統平實，但入口鬆軟充滿叉燒香味，果然冇推介錯！最後甜品要吃兔兔🐰內裡有超飽滿嘅奶皇餡，味道偏甜，個人認為個皮厚啲、少啲餡會更好食～座位坐得幾舒服，當日坐喺窗邊位，望住個城市街景都幾寫意，服務員態度都幾好，大家如果去開灣仔都可以同親朋戚友去試下！