黎到侍應就熱情介紹呢度季節限定既Sake，被譽為清酒之王既「十四代」！呢個場成支賣係要接近$5000。所以我地今晚散叫都要$450啊。果然超容易入口，甜中帶酸，聞落有清新既果香，對得起價錢啊！
飲酒又點少得下酒菜。
鮟鱇魚肝（$68）夠曬綿，一啲都唔腥。面頭帶酸既蘿蔔蓉，配合簡直風味非凡。而且營養非常豐富，啱曬我地兩母女進補一下。
日本脆海蜇（$42），配上青瓜絲，清爽酸甜，入面一樣有蘿蔔蓉。
海苔芝士脆（$48），入面係厚厚既紫菜，出面竟然係脆脆既芝士！第一次咁樣食芝士，芝士夠曬濃味，又脆口，真係大開眼界啊！
燒生蠔（$48/隻），新鮮熱辣燒好既生蠔，一黎到已經飄來陣陣香氣，一啖入口，感覺好厚肉，味道用海鹽調得剛好，唔會過鹹，燒完之後又保持到應有既水分，海水味更突出。
跟住就係燒物拼盤，包括有厚燒牛舌（$68）、燒日本甜薯（$28）、燒豚肉生菜（$42）、明太子手羽先（$36/隻）。
用豚肉包住生菜，令生菜夠曬整齊又可以一啖入口，豚肉燒完既肉汁仲可以幫生菜調味添。
明太子雞翼真係一絕，脆脆既雞皮下面，一咬開面頭既肉已經見到滿滿既明太子！雞肉既嫩滑加上明太子既鹹香，食落味蕾夠曬滿足。
牛舌爽口，面頭海鹽調味，咬落仲好有水份，一啲都唔乾！
日本甜薯一直係我平時超鍾意食既零食，燒完個味道更昇華，更甜！
最後就係極上鰻魚飯（$168），有原條鰻魚啊！之前食左咁多野就食啲薑片先。鰻魚肉質細嫩，感覺入口即溶，上面既醬超足料啊，味道夠曬重，送飯一流！
食飽飽就係同一層行下，原來宜家有Hello Kitty祭，所以周圍都超多Hello Kitty!
