•••••••••••••••••••••••••
同事說好了的升職請食飯。
我哋book好咗唯一嘅廂房，
裝潢毫不花巧，
只是以深淺的木色和玻璃、鏡材搭配，
簡潔、俐落，眼睛看了舒服。
跟店員八一八廂房有冇Min Charge，
原來午市時段2500，晚市就3500，
同事大呼好抵，
店員提醒，諗住用房要盡早預訂，
附近寫字樓有咩喜事升遷都鍾意book房，
所費無幾，privacy
upgrade！ 
店員提起佢哋啲果汁全部現點鮮榨，好似幾正，
而我都大愛西瓜，
不過，正所謂不時不食，西瓜都係留畀夏天啦，
我嘅選擇係冬瓜薏米水，
色水雖然沉實啲，但感覺夠晒正氣，
飲落仲非常之咁真材實料，濃稠得很，
糖水咁嘅質地，糖冬瓜咁嘅味道，
飲完又潤又暖，準備好食豐富嘅晚餐。
雖然話裝修係木調為主，實而不華，
但有啲細節係睇得出用過心思。
你睇呢個擺公筷公羹用嘅托幾咁別緻。
枱上除咗濕紙巾都準備好咗即棄手套，
拆蟹食片皮鴨，抹完手再帶埋手套，乾手淨腳，
堪稱安全第一，萬無一失。
有時落手食好嘢，
食到手指都啜乾淨埋，
又係一種享受嚟嘅，
呢個無疑係店方嘅細心位嚟。
店家好客，傾得興起，
人又未齊，先請我們吃碟小吃，
青瓜沒有一點苦澀味之餘，
更是爽脆得嗦嗦作響，
跟海蜇絲的闢闢啪啪互相呼應，
我等幾個追求嚼感之輩，
樂此不疲的大咬大嚼。
請看前菜加埋填鴨佐料嘅陣容。
醉雞肉質是滑的，賣相也得體。
咦，望真啲點解有個香港區徽嘅？
主角填鴨出場，大家都不其然舉機，
selfie的selfie，story的story。
師傅都見慣鏡頭，唔會怕醜仔，
只係提醒大家唔好掛住影，
記得要趁熱畀佢落刀同埋趁熱品嚐，
唔好嘥咗隻北京直送嘅靚鴨。
・・・・・・・・・・・・・
1
師傅仔劈頭幾刀先起咗個鴨胸皮，稱之為一口酥，
係脆卜卜嘅鴨皮，蘸上砂糖放入口，
酥脆而入口即溶，無以尚之。
 ・・・・・・・・・・・・・
店方一早準備咗兩個大碟，
切好一碟我哋就聽話趁熱食，
食到咁上下，第二碟又已經準備好，
啱晒重視高效率嘅香港人。 
・・・・・・・・・・・・・
汁醬佐料方面，
除咗齊返大路嘅青瓜京蔥同甜醬，
竟然仲有哈蜜瓜添，
除咗顏色更靚，其實少少甜味唔落甜醬咁食都好清新。 
・・・・・・・・・・・・・
味道有啲似杏子果醬嘅自家黃梅醬仲驚喜，
記住要落多啲試真啲個味！ 
・・・・・・・・・・・・・
好有功架之餘，
師傅擺碟仲真心靚靚，
整齊又誘人，相都忍唔住影多兩張。
但最後都冇數到佢片咗幾多塊，
不過見佢鋪到兩碟都滿滿的，
就算唔夠108片都不遠矣。 
鴨鬆生菜包又係正嘢，
啲鴨呀、香芹、菇同筍，
全部切成大小相若嘅小丁粒，
加埋啲松子，和味又有豐富口感。
新鮮西生菜都揀過又裁好晒，
塊塊冇穿冇爛，食起嚟特別得心應手。 
・・・・・・・・・・・・・
醬炒年糕蟹，隻蟹夠新鮮，
啲醬帶少少甜，夠濃郁惹味！
留意係手套出場嘅時候喇。
年糕件件都沾滿晒個濃醬，五分鐘內清碟之作。
・・・・・・・・・・・・・
紅燒肋排做得精緻又好食，
紅麴嘅色調煞是好看，
肉已經煮到離骨，鬆化入味，
仲有小小嘅燭火保溫，
馬上又安歌咗一份，
不過諗深一層，
最好都係唔好等太耐先食，
否則汁又愈煮愈杰，肉都可能會乾，
都係趁熱食啦大家！
個松子魚一眼就睇得出做得靚，
魚肉又嫩，炸漿又薄又脆，個汁份量啱啱好，
唔會過甜過酸，而且仲好上鏡添，
真係有姿勢又有實際㗎。
出嚟食飯冇理由嗌青菜咁齋啩，
整個雪裡蕻毛豆百頁，
味道比較家常啲，清清哋都可以的。
小籠包做到皮完整唔爛，
而且湯汁都唔少，
不過個人始終鍾情臺式嗰啲質地黏身啲，
一放開筷子就穿嗰款小籠包多啲。  
甜品有高力豆沙香蕉，
香口又味道不俗，
但如果可以再脹卜卜啲一定更加上鏡。 
・・・・・・・・・・・・・
小總結:
北京填鴨作為招牌菜，真係必食，$300幾一隻係抵嘅！記得食埋個生菜包。松子魚同紅燒肋排都係賣相味道俱皆嘅項目，啱食就唔好錯過喇！喺房聽到大堂都好熱鬧下呀，推薦大家可以嘅話就book房食更Happy啦。
•••••••••••••••••••••••••
古琴雅苑
灣仔皇后大道東202號QRE
Plaza 19/F
