龍門小棧 (Closed)

星期六我同朋友去動漫展之前先食個晏，排隊入場行完出返嚟分分鐘都成八九點🙈。我哋喺阿信屋買完嘢，就順便幫襯隔離嘅「龍門小棧」。餐廳好似係新開，但已經唔記得咗上手係乜了。小店環境幾四正，落地大玻璃窗令到室內光線充足☀️，感覺開揚。同時，呢度冷氣充足，都算坐得舒服。另一邊廂，店員們態度親切有禮，抵讚👍。餐廳食物定價唔貴，麵食同客飯平均都係六七十蚊以內就有交易。再者，佢亦設有本幫客飯套餐($98)，包前菜、主菜同飲品，我認為套餐更為扺食😃。三寶烤麩，烤麩以麵筋作為原食材，再配以黑木耳同少量菇豆🍄，以小食嚟講份量都幾多。我估計調味採用咗齋蠔油，食落帶少少甜香；而且麵筋好似海綿咁超索汁，好味道。口水雛雞(+$15)，🐔口水雞味道好濃郁，口水醬屬於小辣，但麻味就好強，整體超惹味。雞份量唔算多，但有幾件雞胸肉，所以都OK，而且雞肉並唔係雪到無哩味道嗰種。香酥豬排，🥩豬排大大件兼係厚切，並可選原塊上或切件，原來底部仲墊有蔥同芽菜。豬排外層炸得酥脆，肉質軟嫩，絕非用鬆肉粉醃製就可做到嘅效果。豬排表面蘸咗啲味粉，所以好夠味。上海回鍋肉，🐷回鍋肉同樣大大碟，入面有豬腩片、魚糕、椰菜同燈籠椒等，肉同菜嘅比例適中。