金寧燒肉套餐 $168
金寧燒肉套餐有4款肉，分別係：
豪快黑毛和牛外羣肉4塊，已經加有醬汁，又嫩又多肉汁，好食。豬排骨肉1大件，要剪細分享，肉質好嫩。濟州豬梅肉2塊，超腍。
食堂梨汁雞頸肉，其實係連皮雞腿肉，肉質好嫰滑，味道甜甜地。
1
食堂黑毛豬五花肉套餐 $128
食堂黑毛豬五花肉套餐有3款肉，分別係：
食堂黑毛豬五花肉3塊，塊皮好有彈性，加左醬汁，味道好。食堂牛小排3塊，味道係鹽燒，都係非常嫩而且牛味夠濃，都好食。食堂梨汁雞頸肉都一樣係連皮雞腿肉。兩款燒肉都配有少量蘋果片，大蔥同菇片。
另外配有一大碗白飯，上面灑上紫菜同白芝麻，不過飯粒好硬。
牛燒肉飯 $68
牛燒肉飯一大碗，好多飯係底。肥牛都有好幾塊，唔算韌，味道調得好。伴有少少泡菜，芽菜，洋蔥，仲有溫泉蛋一隻，可以蛋汁撈飯。最後灑上白芝麻粒，紫菜碎同蔥花。飯粒係珍珠米，好有咬口，個牛肉汁撈飯都好食。呢碗飯抵食。
濟州海鮮拉麵 $78
濟州海鮮拉麵就差d。拉麵好tui，普普通通，份量就好多。海鮮有一隻連殼大蝦，連殼青口兩隻，八爪魚一細隻，迷你蜆仔幾隻。質素非常普通。蔬菜配料有洋蔥絲，紅蘿蔔絲同蔥花。個湯少少辣。呢碗麵唔得。
荔枝梳打 加$8
荔枝梳打大大杯，下底有一粒荔枝肉，味道有少許假。
梅子青檸梳打 加$8
梅子青檸梳打就好飲d，主要係青檸味，帶淡淡梅子味道，氣唔算太多。
1
前菜任叫，有4款，泡菜辣中帶甜，送飯一流。白蘿蔔條脆中帶微辣。麻油芽菜爽脆而帶微微麻油香。四季豆同紅蘿蔔好少見，辣中帶蒜蓉味。
爐邊仲可以加泡菜蛋食，任加。等蛋未熟哂就筆起撈飯食就最好食，可以食飽飽。爐邊芝士粟米就要加$25。
今日坐到係窗邊，窗外風景翠綠，景觀開揚。服務員非常忙碌，唔會主動幫手。不過價錢都幾抵。兩大兩細人均$115，食到飽。不過之後口渴左一日。
