呢間餐廳幾好晚飯都可以叫點心，D選擇都幾多。D食物精緻得黎都幾好味。前菜揀咗個海葡萄沙律菜🥗，之前喺冲繩食過但喺香港就比較少見，就算有都通常都會喺日本餐廳，喺呢度有真係好特別，食落幾清新同好開胃，又冇平時食開嗰D海葡萄咁咸。
我哋幾個都好鐘意飲湯，所以叫咗個天山雪蓮燉海星，我未試過燉海星⭐️，個燉湯好清甜，我鐘意佢用茶壼上個湯，keep住熱。
D點心都唔錯，個鮮蝦金魚餃好得意，真係成隻金魚仔咁，又可愛又好味。
海綿叉燒包食落又同其他叉燒包唔同，個皮好軟綿綿好似海綿蛋糕🍰咁。
之後有川辣小炒王🌶，唔算好辣但好惹味，我好鐘意蓮藕，好入味好啱送飯。
我其中一個朋友好鐘意食叉燒🐷，食親飯都要點叉燒，係名乎其實唔叉燒控，呢個叉燒都幾唔錯，肥瘦均勻，唔錯！😋
有人話要有飯氣到肚，所以點咗個和風櫻花蝦炒飯，個飯黎個時我哋都嘩嘩聲，有好多炸櫻花蝦喺個飯上面，好足料，又炒得幾靚仔，好乾身又唔油。
一定要食D菜嘅，濃湯咸燒骨奶白菜又有湯飲又有菜食，D菜吸收晒燒骨濃湯D精華，好好味。
雖然食到好飽，但係甜品係一定要食嘅，叫咗佢哋好出名嘅詐糊🀄，其實就係麻雀造型嘅椰汁糕，好清甜，造型好特別加上有米紙做嘅銀紙，真係可以食錢💵！如果人多仲可以食舖十三么添！😋😋😋
