Running 燒 (Closed)

印象中已經有一段時間無食韓燒，今日同朋友食，都決定揀間有質素嘅。去到旺角呢間running燒，首先各款肉類食材選擇好多，其次跟住有傳統嘅韓式小食，泡菜辛辣味中又帶自然嘅味道，芽菜又有著爽勁，先勝人一籌。接著當然係燒海鮮嘅時間，原隻生蠔、帶子、魷魚、多春魚等等一次過上場，場面都咪話唔震撼。震撼之餘，味覺上亦豐富左我地嘅感受，原隻生蠔保持左濃郁嘅鮮味，絕對選料新鮮; 多春魚條條飽滿，魚肉結實; 而魷魚亦係彈牙非常，一定係必叫之選。肉類方面，牛舌、雪花牛仔肉、牛肪骨、雞翼等等都滿足到我地愛肉之人。輕輕微煎二三十秒牛仔肉，食到嫩滑嘅口感，牛香滿鋪口腔之中; 而燒雞翼將雞皮燒得金黃，皮脆多汁，又係好好食。水冷麵係我地第一次嚐試嘅食品，味道咸咸地，麵條有碎冰伴住，保持住彈牙嘅質感。最後嘅甜品時間有韓式雪條，香蕉味、蜜瓜味任君選擇，味道清新自然，可以化解油膩嘅感覺。