潮洲滷 (Closed)

難得假日同媽媽黎到灣仔周圍遊下，去街市行行下見到呢間滷水店就諗起好耐都無食滷水鵝，一於買返屋企做晚飯加料！滷水店細細間，店鋪乾淨企理，位於石水渠街小巷內，滷味排得整齊比客人係玻璃窗外選擇，每款滷味充滿光澤，中午時間已經要排隊。滷水款式太多，同媽媽諗左陣最後決定點1/4份滷水鵝，再拼滷水鵝腎，腩肉，滷蛋，紅腸，滷豬大腸，滷水豆腐。滷水鵝色澤光鮮唔暗啞，証明新鮮。鵝肉油份充帶有濃厚鵝油香味，肉質厚，嫩滑之餘又不會過淋失去肉應有的嚼口，肥瘦均勻咬落口唔會太油膩，滷水味香而且調味恰到好處又唔會過咸，鵝肉吸盡滷水汁👍🏻滷水鵝腎爽脆，滷水十分入味，入口有嚼口結實又唔會過靭，沾上小小滷水汁更香。滷肉腩肉肥瘦分明，一層肥肉一層瘦肉，每片切得均勻，食落口濃厚又唔會覺得成口肥油。滷水豬大腸處理得乾淨清潔，放心食，平日最怕豬大腸膻味過濃，但潮洲滷既豬大腸唔膻而且又唔會太肥膩，豬大腸柔軟入味。滷水蛋同豆腐吸盡滷水汁精華，豆腐豆味香而且結實唔鬆散，入口軟綿。老闆好客，親切，下次經過一定會再買返去加餸！