潮江春 (Closed)

今日係大埔補完習，咁岩屋企人經過附近，咁就係大埔食埋晚餐先返屋企啦。行過見到潮江春個餐牌轉左，於是入去試試有無改善左。今日叫左三個餸，鹵水鵝片、煎蠔烙同肉骨茶。先講講鹵水鵝片，鹵水味非常甘香，而且味道夠濃，咸香味重，不過佢d肉質一d都唔會鹵到實晒，非常難得，肉質依然好嫩滑，非常值得一試。至於個煎蠔烙，都煎得幾金黃，粉唔算多，但蠔仔鋪滿成個面，非常足料。加埋魚露，咸鮮味十足。肉骨茶佢係新加坡式，蒜頭味比較重，但個一字骨煮得好淋，一咬就成條骨甩，配甜豉油非常好食。總括來說，雖然潮江春係連鎖餐廳，但質素保持得非常不錯，性價比高。