潮州鹵漢大飯店 (Closed)

餐廳主打潮式火鍋，提供四款套餐，今次揀咗B餐極品和牛（$258，另加一，120分鐘，7：30前離座）。湯底要咗招牌鹵水鍋，上枱時先到黑過墨斗，以為會好咸，好在咸味適中。牛肉有四種，精選極品和牛（比較肥）、安格斯牛小排、特級封門柳、美國安格斯牛肩胛（比較嚡），牛小排同封門柳比較好，所以主要都係食呢兩種。除咗牛肉，都叫咗白鱔片（尚算彈牙）、海蝦（普通，似養蝦多啲）、是日海鮮（聖子仔，一般，有幾隻有沙），脆鲩骨腩（爽口）、墨魚滑（正常）、蝦滑（一般）、鵝腸（冇咩肥膏）。熟食有自助同落單。自助嗰啲好一般（鹵水鵝要去到我走先出現，只影咗相，冇食過）。落單首推普靈豆腐，外脆內軟，點埋個汁，咸咸哋，好食。整體嚟講，呢餐不過不失，可以一試。