潮洲滷 (Closed)

今日下晝去咗呢間舖頭細細嘅潮州滷買四寶飯做午餐，呢間舖頭喺葵芳都開咗唔少日子，不過我未幫襯過，今次係第一次。佢只係做外賣嘅，舖面可以見到一隻隻掛喺度嘅滷水鵝同其他滷水食物！招呼就一般啦，你話要乜，佢就去切，整完收錢，交流就係咁多嘞！不過外賣店好多時都係咁，冇乜所謂！四寶飯入面有一隻切開嘅滷水雞全翼 、四五嚿豬耳、一隻滷水蛋同埋一嚿滷水豆腐，成個飯面都鋪滿晒餸，睇落都幾抵食！佢啲滷水汁唔算太濃，味道都幾好，不過就好似好多油！我仲以為四寶是旦有一樣會係鵝件或者鴨件，就算鵝翼鴨翼都好丫，點知淨係得雞翼，有啲失望！ 雞翼滷得幾入味，冰鮮雞就一定架啦，肉都幾嫩滑，不過味道實在冇乜驚喜；豬耳整得好稔好入味，不過真係好油好肥，而且面頭仲有啲硬毛，我食咗兩嚿已經覺得好膩！滷水蛋亦又唔係滷鴨蛋，都係雞蛋，不過隻蛋本身嘅質感幾好，蛋白又彈又滑，蛋黃甘香，再加埋滷水汁都真係幾好味！豆腐係成嚿切比我嘅，夠豆香亦算滑，味道都算唔錯！不過最慘不忍睹嘅係盒白飯，因為佢啲滷水汁同滷水食物真係太油太肥膩嘞，盒飯個底全部都係油，油浸飯喺冬天真係有啲難頂喎！要試都係買淨餸好嘞！