燒魂 (Closed)

朋友想食壽司放題，而我就想食烤肉，唔通我地為左一餐飯就要傷和氣？！好彩朋友一句"why not both??" 就揀左呢間放題加烤肉2小時嘅餐廳，滿足哂我地2個願望。餐廳近地鐵站，只需要行5分鐘便到達。壽司，刺身，熟食，一品鍋，烤肉有齊豬牛雞同蔬菜，選擇都唔少。仲有飲品任飲。先黎個刺身拼盤。馬刀貝爽口，珍寶赤蝦夠大隻。烤肉揀左薄切牛舌，牛里肌同黑毛和牛。全部都係薄切，好快就燒好，有得食。牛味唔錯，入口唔會韌。燒雞翼揀左柚子味同孜然味，味道較淡。我好欣賞黑松露雞髀菇同燒菠蘿。前者係雞髀菇夾住黑松露，好香又夠jucy。燒菠蘿又甜又香，仲可以減低燒肉油膩感，真係好正。其他熟食都相當唔錯㗎。卜卜蜆煲，唔會好大份，大概有6-7隻蜆，每隻都脹卜卜，夠哂肥美。配合蘿蔔清湯底，真係連湯都想飲埋呀。揚物裏最喜歡南瓜香芋丸，外脆內軟，正。蒜爆通菜好惹味。收碟速度頗快，服務尚可。每樣食物都食少少，仲有好多款未試，但已經飽到上心口啦，我同朋友都好滿足呀。