成個鍋堆到成座小山咁高，視覺效果滿分！望真啲，入面料多到瀉：大大隻嘅鮑魚、脹卜卜嘅大蜆同青口、仲有新鮮八爪魚、大大隻嘅虎蝦，底下仲鋪滿咗豆芽、金菇、仲有吸晒精華嘅韓式粉絲，睇見都流口水！
個湯底先係靈魂所在！店員會即席幫你倒上秘製嘅韓國辣湯，然後開火滾起。滾到「卟卟」聲嘅時候，個香味「嘭」一聲爆發岀嚟！唔係死辣嗰種，係一種好豐富嘅鮮甜辣味，聞到已經胃口大開！
飲一啖湯先！嘩！真係鮮到一個點！集齊咗所有海鮮嘅精華，辣辣地又帶啲甜，飲完成個身暖笠笠，好舒服！跟住食隻虎蝦，蝦肉爽彈到不得了，仲要好貼心咁開咗邊，一啖食落去，鮮味爆岀！隻鮑魚烚到啱啱好，煙韌得嚟又唔會韌，蘸少少佢哋特製嘅韓式辣醬，真係無得彈！
最正係啲八爪魚，食嘅時候仲係好彈牙，鮮味十足，完全無雪藏味。而底層嘅粉絲索盡晒成個海鮮鍋嘅精華，每一條都係美味嘅結晶，掛住辣辣哋嘅湯汁，嗦一聲吸入口，真係滿足感爆燈！
成個鍋份量十足，兩個人食到捧住個肚走！鍾意食海鮮同韓國菜嘅你，真係要嚟試下呢個「滾熱辣」嘅釜山風味！
