康瑞涼茶 (Closed)

木嘴前排突然好想食芋圓，係想食到朝思暮想，發夢都夢到芋圓果隻。呢種毒癮一起，真係好難頂，恨食恨到覺得自己就黎發痲，終於幾經辛苦搵到晚有機會去深水埗食呢間出名食芋圓既糖水店一解毒癮。當晚懷住極興奮嘅心情，晚飯都唔食直接就黎食糖水。因爲去既時間係晚飯時間所以間店無乜人好清靜，可以慢慢坐唔怕比人趕。佢款色唔多，但真係好平，廿蚊有交易，非常良心。本身諗住一次過叫幾碗瘋狂狂食，但一望住自己越趨圓潤既體型，都係算吧啦。最後淨係叫左一碗，仲要特登迫自己叫碗清D既野，最後就揀左桂棗雪耳配芋圓，而木嘴朋友就食特式仙草百配。鑑於本人粗劣嘅拍攝，下面呢張相雖然影唔到D圓，但其實係非常足料，有芋圓，地瓜圓，小丸子同埋珍珠，食得好滿足，芋圓同地瓜圓好彈口，好似本人既皮膚咁彈，好正。桂棗雪耳除左養顏仲可以滋潤下我個木嘴，令木嘴短暫變濕嘴。朋友既仙草百配，望落都知超足料。D仙草好滑，滑到不都不唔起，望住朋友好努力咁不起D仙草實在非常滑稽，唔講仲以為佢係扮緊邊個諧星或者佢本身就係一個諧星。總括黎講，呢餐糖水真係令木嘴超級滿足，既食得飽，又好食，又平，又能夠一解木嘴既芋圓毒癮。唉唔再講喇，再講我既芋圓毒癮又會發作嫁喇。