研究咗一輪之下我哋所定再試下呢一間石姐辣蟹雞煲小菜皇， 入到去座無虛席，可見應該有一定質素。
1
餐牌上面都有幾多選擇，一時都會花多眼亂。
見到有唔少嘅食客都選擇咗食雞煲或者辣蟹，坐隔離都聞到好香，不過可惜我哋人數少，好難去食呢啲咁大份量嘅嘢，下次一定要試下。
人數少有人數少嘅食法，我哋都係選擇咗食小菜， 分別叫咗生炒骨、啫啫通菜煲，同埋蜜椒薯仔牛柳粒。
先來一上枱就啫啫聲嘅通菜煲，鐵煲上碟， 夠曬熱辣辣，而且用咗蝦膏去炒，非常之有鹹香味，再加上椒絲、肉碎、蝦乾，香口之餘仲好足料，好少見食肆會捨得落咁大條蝦乾，呢個菜送飯一流。
跟住就係蜜椒薯仔牛柳粒，作為配角既薯仔估唔到咁好食，外面非常脆口，被蜜汁包住，甜甜脆脆，食到最尾都依家脆卜卜。老闆話用咗好多心機，蒸完再用細火慢慢炸，所以先會咁金黃咁脆。
而牛柳粒好軟好嫩，而且好入味，邊位煎得好香口。
另外仲叫咗個生炒骨，醬汁酸酸甜甜，但唔會太酸，唔會好似出面部分餐廳咁有醋味，味道啱啱好。
啲汁緊緊包住排骨，但係依然脆身，唔會浸淋，而且唔會太多骨，肉比較多，口感幾好，鐘意食肉既朋友會幾啱。
整體而言小菜味道唔錯，非常有鑊氣，價錢都唔貴，平日晚飯都會係唔錯既選擇。
