火鍋湯底同火鍋配料選擇多，價值相宜。
魚翅花膠雞湯$168
朋友推介嘅就係佢。係好濃郁嘅雞燉湯， 每一啖都似係飲緊雞嘅精華。用料十足，就連花膠都毫不吝嗇。由於太好飲，未打邊爐我已經飲左兩大碗。果然係好介紹！
頂級手切鮮肥牛 (大)$298
打邊爐點可以唔叫牛肉。要食就梗係要食最好嘅。不負眾望，牛肉好新鮮，輕輕一淥，點一點豉油，已經好食到停唔到口。
炸魚皮$38
十分脆口，咸咸香香，仲以為自己食緊薯片，好味道！
白鱔片$78
切到薄薄一片，食落夠彈牙，新鮮無泥味，重點係完全唔腥。
午餐肉$38
午餐肉係我打邊爐必點嘅食物。佢嘅午餐肉係厚切，索曬雞湯味，每一啖都好滿足。
皇帝菜$35
份量十足，多到好似一個菜籃咁，爽口清甜，食得出好新鮮。
炸竽件$28
竽件外層炸到香脆，入面卻十分鬆化。朋友話，唔使淥，就咁食都好好味。
魚皮餃$38
自家制魚皮餃，大大粒，共有8隻。外層魚皮唔會太厚，帶點煙韌唔會過硬。內餡鮮甜，必點食物之一。
估唔到長沙灣都有咁高質素嘅火鍋店，湯底更係令人回味無窮。必定會再光顧，下次試埋佢個雞煲先。
