天時暑熱, 女友話: 如果有一杯冰凍既青檸梳打飲, 咁就好啦!!
我二話不說, 即刻帶左佢黎 pho tai 食越南野~
眼見呢度除左單點食品, 仲有 3 款套餐選擇.
set A ($40) : 一般粉麵 + 港式飲品
set B ($45): 一般粉麵 + 越式特飲
set C ($55): 一般粉麵 + 越式特飲 + 半份小食
套餐 d 小食好似唔多岩我地口味, 所我地兩個都選擇左 set B
1) 生牛肉湯河 + 青檸梳打
2) 雞絲凍檬粉 + 越式冰咖啡
一點完餐, 侍應即刻放底一小籃芽菜仔, 青檸, 香葉, 應該係為湯河而設既~
轉個頭, 生牛肉湯河就到啦~ 碗河粉好簡單, 就咁得河粉, 葱粒同幾片生牛肉~
女友手快快落左幾片香葉, 滴左青檸汁, 仲放埋兩小件青檸落個湯, 我就把握時間為 "生牛河" 影相~
我影完第一張相, 女友已經快快手落埋一堆芽菜仔, 我又即刻影張相.
個湯都幾熱, 轉眼牛肉浸住湯既部份已經熟左, 女友求其將所有材料響湯中撈勻, 就開始食~
佢話個湯甜甜地, 又有 d 胡椒味, 河粉都算滑, 加埋 d 配料, 算係幾好食~
牛肉唔 "鞋" 口又有牛味, 不過得果 3 薄片, 略嫌太少.
雞絲凍檬無乜特別, 食落口既感覺係室溫, 個人覺得唔夠凍. :(
青檸梳打 = 1 隻裝住冰 & 青檸既杯 + 1 罐 watsXn's 梳打水你自己倒落去.
女友發現佢係落左 d 沙糖響杯底, 落左梳打水後, 一陣 d 沙糖都已經溶哂~
越式冰咖啡, 好甜同無乜咖啡香味, 似一般幾蚊 1 罐果 d 罐裝咖啡咁. 不值一試. :(
明明我地食左 $45 既 set B, 賣單果陣, 發現佢寫錯 $55 既 set C
各位食野真係要睇單呀!!
