2
新蒲崗呢啲地方真係好日都唔會去，唔係咁啱响嗰頭做嘢，都唔會誤打誤撞入咗新蒲崗廣場。傍晚時份，個商場只得小貓三兩。我餓到冇氣冇力，見到有間日式放題，$218加埋一都係$240，門口仲大大隻字寫住生蚝任食，仲唔衝入去咩。
响衝入去之前，環顧四周，門口有個雪糕櫃，裡面係雀巢牛奶公司，隔籬張枱上面有類似紅豆沙嘅糖水，同埋自助沖菊蜜之類嘅熱飲。好似唔係好對路，不過新蒲崗對於我黎講仲山卡啦過羅湖(因為冇地鐵)，唔識路又唔想再搵食肆，唯有踫踫運氣，入咗去先算。
室內陳設簡陋，入門口對正個廚房，則邊有個閒置咗嘅魚生櫃。牆身粉紅色，有啲似茶記裝潢。
睇飲品，都係嗰幾味，汽水，綠茶，種類都算多。
再睇則邊嘅係甜品同前菜，啲中華沙律，海蜇已經俾個雪櫃吹到面都乾埋，啲八爪魚仔就醬多過肉。
甜品仲得意，啫喱，涼粉，水果沙律係意料之內，至於個味噌汁湯碗埋面竟然係雪耳糖水，呢吓真係估你唔到。
1
唔緊要，呢啲都係次要，重要嘅魚生掂就得啦，仲有生蚝喎，實回本啦。埋番位，睇餐紙，咦! 好似少嘢揀啲喎，唔好理，剔咗啲魚生先，整多兩隻蚝 (每人第一次可以叫兩隻，之後要一隻一隻咁點)。魚生新鮮，爽口，因為夠凍，件件好整齊，不過就冇咩味，個帶子唔錯喎，三文魚都可以，咁隻蚝呢?
此店最大賣點，會係點呢? 好大隻，好厚肉，好爽口，不過都好腥，仲有啲甘苦，唔落cocktail sauce係唔得嘅。原先仲以為要逐隻叫咁麻煩，而家直頭唔會再叫。
天婦羅都唔差，以港式標準黎講。
汁燒可樂骨幾好喎。
壽司質素都達標, 玉子壽司除外。
個蝦兵蟹蓋其實唔錯，賣相吸引, 但係個餡好多美乃滋同漿粉，焗完之後感覺油油的。
濃湯煮野菜什菇反而幾好，可能湯底係事先調配好，冇得輸掛。
一口牛係好食嘅，上枱時仲香噴噴，味道好，不過有啲筋。
就係咁，我就响一個唔熟悉嘅地方，食咗個唔知點講嘅港日放題。佢價錢唔算貴，旺角嗰啲大X喜，大喜X，都要成三舊水一位，不過人地多嘢揀啲，環境好啲，坐得舒服啲。講性價比，$240算係咁，有蚝任食喎，其實係抵嘅，唔計蚝嘅質素嘅話。難怪响星期二晚上，都人來人往，坐無虛席。
