亞當麵館 (Closed)

今日嚟到尖沙咀覓食，響眾多選擇下，揀咗呢間位於樂道23号嘅亞當麵館，舖面雖然不算好大，但整潔有序，座位闊落，讓食客可以舒舒服服品嚐。這家店以車仔麵為主打，另有售賣特色小食，在點餐時提供了多樣的選擇。見到餐單有好幾款小食都有興趣，我們索性點1碗車仔麵，再點幾款小食品嚐。我們點咗招牌秘制鹵水什錦麵，有8款餸之多，有豬大腸、生腸、豬耳、金錢肚、雞腎、雞中亦、日本溏心蛋同腩肉，特別要讚系佢嘅腩肉，好耐無食過好爽嘅腩肉，肉質肥瘦均勻，豬耳嘅軟骨口感好，平時少食內臟，但見洗得好乾淨，忍唔住品嚐一下，豬肉味濃，加埋老闆自家製辣椒油，不得了、無得輸。。廚師煮麵的功夫了得！麵條彈牙有嚼勁，湯底充滿濃郁嘅肉骨味道。小食方面，點了店家推薦的金沙脆皮牛坑腩、泰式鳳爪、咖哩魷魚、椒鹽八爪魚仔。幾款小食各有特式，牛坑腩外層酥脆，濃濃嘅咸蛋包裹住牛坑腩，多重口感結合。椒鹽八爪魚咀有咬勁，椒鹽很惹味。泰式鳳爪用咗洋蔥作為配菜，辣味很輕微，甜酸適中，剛好平衡咗煎炸食物嘅油膩感。