萬芳冰室 (建德街) (Moved) New Location

前排聽朋友介紹元朗有間，決定週末嚟試試。雖然位置就隔涉咗啲，不過間鋪嘅懷舊裝修，老遠都認到佢嘅招牌藍色外牆。撞正下午茶時段，門口都仲係好多人排緊隊。見咁多人專登嚟捧場，今次實有食神啦><內裡嘅裝修就好似時光倒流去返舊時傳統港式冰室，啲卡位同地板都充滿住60年代嘅感覺。我叫咗個"瑞士汁煎特大豬扒一丁"。塊豬扒煎得恰到好處，大分得來又夠juicy，直頭好食到想叫多塊。出前一丁麵就不用多說，配埋招牌嘅瑞士汁就一絕，不過我就嫌唔夠多瑞士汁，下次落單個陣記得同個侍應要"多汁"。朋友就叫咗碟"招牌輝哥沙茶小鳳蝦炒飯"，每啖都充滿著沙茶醬嘅味道，比起平時茶記嘅炒飯特別香同惹味。除咗有爽口彈牙蝦仁之外，仲有其他配料例如叉燒粒，蛋，菜粒等等。朋友肚餓得滯叫多咗碟"生炸雞翼尖"，依度啲雞翼係即叫即炸架，上枱面嘅時候仲係香噴噴熱辣辣的，外皮炸得好脆，內裡都仲係鮮嫩多汁。特別抵讚嘅係佢杯"紅豆冰"，用咗高身嘅玻璃杯盛載著，望落好大杯。啖啖紅豆，配上香滑花奶，炎炎夏日，簡直係涼透心。