伴糖水 (Closed)

番屋企途中，見到呢間店，門面好光猛，加上主打港式甜品，吸引左我去睇。店內企理，面積唔大，主打做外賣。一入去，老闆好有禮貌咁問需唔需要介紹糖水，糖水每日新鮮調製，一切都係小店擁有既人情味。除左糖水，佢仲有小食，望個樣都好吸引，尤其係咖央多士，但岩岩食飽飯，留番下次有機會再試。桑寄生蓮子蛋茶女人恩物😍，十分滋陰，甜度剛剛好，唔會太甜。好足料，有大大隻雞蛋🥚、紅棗、蓮子、桂圓，樣樣都大大粒，唔係間間糖水店都會有呢款糖水👍👍椰汁喳咋好多唔同種類既豆，每一啖都食到，再加埋椰汁令糖水更加香濃，味道更正😋等糖水途中，老闆娘不停同客人溝通，細心交代如果未食就要放雪櫃，之後最好用煲加熱，唔好叮熱。雖然糖水款式唔算太多，但我覺得真正好味既中式糖水係唔駛靠多款式黎吸引客人。