時至今日車仔麵仍然係香港人嘅恩物，特別係打工仔午飯倉猝，黎一碗車仔麵就最好不過。
銅鑼灣嘅麵尊早起2010年已經起上環立足，近年事業擴展到銅鑼灣登龍街，價錢實惠、裝修時尚、味道吸引所以都長期吸引咗一班香港人專誠排隊。
車仔麵 🍜： 7/10
今日我就嗌咗雞翼、白蘿蔔、冬菇米線加小辣。
佢嘅招牌麻椒醬果然冇令人失望，非常香口，味道好好有層次。難怪有人刻意買番屋企送麵。冬菇嘅蠔油同瑞士雞翼汁加入腩汁湯底，令到個湯底層次昇華。
配料嘅質素水平我會話平均高中以上， 但我會話文記嘅瑞士汁雞翼比較入味、嫩口。
美中不足嘅係米線煮唔夠熟，咬落去有啲硬身。等候時間頗長，落單後差唔多20分鐘先上菜，建議舖頭請多啲人手。而且紙巾同水都要另外收費，都會令人印象扣分。
裝修同包裝方面，都感覺到老闆用咗唔小心機，嘗試加入唔同香港元素例如霓虹燈、70年代的電影海報、雞公碗元素。整體以味道、裝修同食物質素，麵尊會係港島人一個好好嘅車仔麵選擇。
