渝。湘菜館 (Closed)

今日午餐去左渝。湘菜館試新野，位於佐敦廟街。餐廳好似開左無耐。呢度有午市客飯套餐，一共有7款餸，價錢由$52至$68不等，包餐前小食一碟，是日例湯同白飯一碗。餐前小食係蒜蓉辣椒黑白木耳，味道少少酸辣，口感爽脆。是日例湯係黃瓜豬骨湯，都好清。香濃酸菜魚 $68香濃酸菜魚熱辣辣大大兜上枱。連皮魚片大概有10塊左右，勁滑溜又嫩口，正。其他配料當然有酸菜，仲有大白菜，芽菜同滑溜煙韌粉條。面頭灑上白芝麻粒同香茜。叫左少辣，味道啱啱好。爆香酸菜牛肉 $65爆香酸菜牛肉基本上係同香濃酸菜魚一樣，不過魚片變左牛肉。牛肉都好嫩，份量大概有10片左右。魚香茄子 $52茄子切條，煮得非常淋，加左肉碎，蔥花，同辣椒一齊整。味道調得好好，叫左少辣都唔辣，食落都唔覺油膩。外婆菜炒四季豆肉沫 $58四季豆原來係切細粒，同肉碎，蒜蓉，辣椒，蔥花，酸菜同豆豉一齊炒。叫左少辣，食落酸酸地，都幾好味。每個餐跟白飯一碗。津路烏龍 $12津路烏龍係支裝，食川菜一定要飲凍飲。味道帶淡淡茶味，夠解渴。所有餸菜都熱辣辣上枱，即叫即整，都好好食，而價錢好抵。