茶救星球蔬果茶 (Closed)

近排手打檸檬茶大行其道，只係旺角食街就開左4間，其中一間比較與別不同就係茶救星球蔬果茶。佢主打唔至係普通檸檬茶，而係首創手打苦瓜檸檬茶。本身都有啲郤步，究竟味道會唔會好苦。不過見有咁多人試過，而且佢係店舖都有提過「苦瓜唔苦」的Slogan，咁就試下佢的苦瓜檸檬茶同埋另一招牌牛油果甘露。<苦瓜檸檬茶>一飲落去個味道都幾驚喜，開頭你會飲到香水檸檬加埋茉莉茶的味道。另外佢加左苦瓜粒同埋薄荷葉，飲飲下你就會飲到清涼同埋帶回甘味，完全Feel到飲完可以做到清熱、解毒的效果。由於佢係手打同埋用上苦瓜粒，所以飲的時候會食到苦瓜，更加提升清新回甘的味道。<牛油果甘露>呢杯都幾有驚喜，以新鮮牛油果打成奶昔，所以飲落去好似絲質的感覺。但有時只係得牛油果個味道會比較單調，所以呢度特別加埋芒果蓉，增加清甜的味道。為左提升豐富的口感，裏面仲加左份量唔少的牛油果粒粒及芒果粒粒，基本上飲每一啖都會食到，所以都幾抵飲!最後，每杯飲品佢都會隨機附送麻雀一隻，加上店舖提供「苦瓜豬」公仔增加打咭效果!