去到門口睇完個餐牌覺得價錢都幾貼地，款式又多，仲免收加一，所以就入咗去試😋
雖然呢間餐廳1956年已經開業，但環境都幾新淨，坐得好舒服。
餐廳入面仲有一幅好巨型嘅噴畫👀 入到嚟完全覺得佢唔係行懷舊路線，反而係與時並進，連菜式都好多樣化！
1
連酸菜魚、蛋包飯、喇沙都有🙊
我嚟到已經係下午茶時段，佢哋下午茶係14:00-18:30！今次我就叫咗幾款人氣菜式，我見唔少foodies都有推薦🤣
❤️ 避風塘生炸雞脾配紅豆冰 $38 (轉茶走紅豆冰 另+$9)
避風塘生炸雞脾絕對係呢度係熱門菜式，幾乎每枱都有一碟，見到有人叫外賣，都淨係叫呢個！炸雞脾都幾大隻炸到皮脆肉嫩，好juicy！面頭超多蒜粒，蒜香幾重，食落都有啲辣，口水不停分泌，惹味又過癮！
第一次飲茶走紅豆冰，茶味濃，唔會過甜！
好食度：⭐️⭐️⭐️⭐️ (4/5)
❤️ 咸蛋黃雞中翼 $35 (樽仔奶茶 另+$9)
呢個真係必叫！一上枱已經好香鹹蛋黃味，外皮炸到好酥脆，沾滿哂鹹蛋黃，仲食有少少鹹蛋黃粒，好邪惡呀😈 雞翼底下仲鋪咗啲脆脆墊底，我連啲脆脆都食哂😂 一滴鹹蛋黃汁都無剩😉
樽仔奶茶又係必叫😹 樽仔已經事先雪凍咗❄️ 茶味好濃，帶少少回甘，口感幼滑濃厚，用樽仔裝住都幾cute可以打下卡！如果想食紅豆，我會建議飲返茶走紅豆冰😎
好食度：⭐️⭐️⭐️⭐️✨ (4.5/5)
❤️ 經典芝蛋牛肉漢堡 $36
麵包好軟熟😮 個漢堡入面塊牛肉都算厚，肉質一啲都唔乾有醃過。芝士呈半溶狀態，再配埋流心煎蛋，真係比連鎖快餐店更好食！仲要唔貴🤭
好食度：⭐️⭐️⭐️✨ (3.5/5)
❤️ 無骨霸皇雞飯 $60
1
見到呢款係每日限定100份就叫咗嚟試！面頭好多蔥，雞肉皮薄而且肉質好嫰滑，熟嘅程度掌握得啱啱好，薑蔥味濃😋 好入味！
好食度：⭐️⭐️⭐️⭐️ (4/5)
餐廳推薦度：⭐️⭐️⭐️⭐️ (4/5)
叫咗咁多嘢都唔過二百蚊，都係百幾咋🤩 性價比超高，而且樣樣食物都好惹味😋 我仲有好多款都想試，下次會再過嚟食！💕
