Video
Read full review
2016-06-15
549 views
好耐無同舊公司好友單獨吃飯, 諗起以前每日返工的動力都係呢位好友, 每日食lunch都要聚埋一齊講是非、傾電影、傾美劇, 難免會有少少失落...幸好轉工後大家公司地點相近, 放工時間也相同, 總算可以偶爾聚聚餐。好友家住大圍, 為方便大家回家,就鎖定於大圍聚舊!雖耳聞大圍特式小店處處, 但今次才是第一次光臨大圍食店, 感覺很新鮮~原本「風車」的店名我聯想到的是與世隔絕的cafe小屋, 但原來係提供各式西班牙菜式和小食, 營業到深夜的半酒吧式西餐廳!聽說酒牌剛申請了一個月左右, 所以就有happy hour 9時前買一送一的優惠! 又趁著最近歐國盃, 店內的高清大電視極受歡迎! 營業時間平日直到3am, 假期前夕開到4am! 半夜都會提供正價飲品和特式小食, 屋企無波睇不妨落黎感受下~難得的是雖然是間半酒吧, 但環境非常乾淨舒適, 一點煙臭味都沒有, 店內播的音樂亦不算嘈吵, 感覺不錯。好友說開業時已經光顧過一次, 現在再來感覺也沒什麼差別。今晚我們目標係狂傾計同食好西, MENU上面的set dinner好多選擇喎! 一個價錢已包括頭盤、湯、主菜和飲品, 而且可以自由配搭頭盤和主菜,
好友家住大圍, 為方便大家回家,就鎖定於大圍聚舊!
雖耳聞大圍特式小店處處, 但今次才是第一次光臨大圍食店, 感覺很新鮮~
原本「風車」的店名我聯想到的是與世隔絕的cafe小屋, 但原來係提供各式西班牙菜式和小食, 營業到深夜的半酒吧式西餐廳!
聽說酒牌剛申請了一個月左右, 所以就有happy hour 9時前買一送一的優惠!
又趁著最近歐國盃, 店內的高清大電視極受歡迎! 營業時間平日直到3am, 假期前夕開到4am! 半夜都會提供正價飲品和特式小食, 屋企無波睇不妨落黎感受下~難得的是雖然是間半酒吧, 但環境非常乾淨舒適, 一點煙臭味都沒有, 店內播的音樂亦不算嘈吵, 感覺不錯。好友說開業時已經光顧過一次, 現在再來感覺也沒什麼差別。
今晚我們目標係狂傾計同食好西, MENU上面的set dinner好多選擇喎! 一個價錢已包括頭盤、湯、主菜和飲品, 而且可以自由配搭頭盤和主菜, 幾款都好吸引, 最後我們一人選了一個set。
點菜後服務員給我們送來餐前小吃, 多士配特式蕃茄醬。蕃茄醬原來是自家製的, 甜甜酸酸好開胃!
頭盤我一早心儀了這道西班牙小香腸配些厘酒汁!為解膩仲配埋小片的麵包。
原本以為小香腸會好咸好濃味, 但原來食落似煎香的台灣腸, 但口感比台灣腸更紮實,加左些厘酒汁更加入味香濃~
另一個頭盤我們實在考慮良久.....最後還是決定試一試這個秘魯辣醬豬腩仔配牛油果醬及自家制玉米餅皮~呢一道真係有驚喜, 好好食! 玉米餅皮比較軟身, 豬腩仔爽口到好似豬頸肉咁,上面的牛油果醬同蕃茄醬都係自家製, 一咬落去有幾種唔同層次, 秘魯辣醬只有少許麻香但唔會覺得辣, 牛油果醬出奇地完全不膩, 而我覺得重點就係上面的洋蔥絲, 完全係整道菜的點綴, 只有3件真係唔夠喉啊!
呢度主打的小食都好適合女生一件一口, 方便又美味, 下次再黎都會order呢2個小食!
湯方面可以揀熱湯或者凍湯, 我對凍湯無咩興趣, 所以選了熱湯, 今天的是南瓜忌廉湯~湯非常濃稠, 比較似食緊南瓜羹, 而且南瓜好甜!!!! 店員說是每天12點才開始弄當日的湯, 而且會用新鮮食材所以真的非常好喝~食完頭盤飲完個湯都已經飽了一半~
主菜我們選了一牛一羊。牛是選肉眼扒配焦糖菠蘿(set dinner $188)
肉眼扒熟左少少, 雖然牛味好濃但韌左dd~
焦糖菠蘿又係用新鮮菠蘿去燒, 表面像creme brulee咁脆脆地甜甜地, 而菠蘿就好juicy好甜~~~兩種甜混合埋一齊可以解肉類的膩。而炸薯角都幾有份量, 夠飽肚。
比起牛, 我們更喜歡這道烤羊架配薄荷乳酪(set dinner $188)平時羊肉多數配薄荷啫喱, 而我其實都幾唔中意果個醬....主要係外表影響啦XD
呢度用薄荷乳酪, 除左外表變了白色看起來較易接受之外, 味道亦都清新好多, 好適合去羶味。
羊架烤得剛好而且肉質好嫩, 底下還有薯蓉和配菜, 我們兩個女生都低估了兩道主菜的威力, 食到中段開始後勁不繼, 但因為味道實在好, 不想浪費結果慢慢吃光XD下次如果再跟女生來的話我一定會點一個肉一個魚或者飯的.....
最後我忍痛放棄了會令我更飽肚的咖啡, 點了杯熱檸茶, 為這一餐劃上完美句號。呢間餐廳唯一要挑剔的大概只有地理位置吧, 從港鐵站走大概要6-8分鐘左右, 但到8時左右已經開始滿座, 座上也有不少早早就來喝啤酒聊天坐了好久的客人。下次如果男友不怕遠, 我一定帶他來!
Post
