川味滷水拼盤
個餐包限量前菜。先黎一份川味滷水拼盤，係暖架！等你食住等湯底。滷水拼盤有鵝翼尖6隻，好腍嘅豬腩肉3件，紅腸3片，豆腐3件，同花生。係唔辣既。
前菜都有鹹蛋黃炸魚皮，鹹蛋黃味道真係好香，魚皮好脆，味道稍鹹。
落單用QR code，每次落單只可以叫三份，我地一行2人，每次大部份肉類都上兩份比我地。包以下食物：
花膠美人鍋
湯底6選1，今次湯底多咗兩個選擇。我地揀左呢個花膠美人鍋，其他係鴨血麻辣，皮蛋芫茜豆腐，澳門豬骨，老壇酸菜鍋同海皇海鮮鍋。花膠美人鍋有8件魚肚，仲有紅棗同杞子。個湯雞味濃，鹹度足夠不過好清，個湯底好健康，而淥野食都夠味。
安格斯極佳級精修肥牛
呢度d肉唔會太薄切，食落有質感。安格斯極佳級精修肥牛牛味濃，只係脂肪稍為多。
美國安格斯牛肩胛
牛味都係濃，非常嫩口，今晚我地主攻呢款牛肉。
安格斯封門柳
牛味都好濃，較瘦，所以無咁嫩口，但係牛味都好濃。
伊比利亞黑毛豬
脂肪平均，食落質感同豬味都唔錯，我地都有主攻呢款肉。
黑毛豬捲腩
黑毛豬捲腩係圓形切割，食落比伊比利亞黑毛豬當然更爽口。
紐西蘭羊肉片
紐西蘭羊肉片係圓形切割，食落好嫩口，脂肪少，味道只有少少羶。我地都主力食羊。
鮮脆鯇魚肉
淥一陣就食都好脆口，好鮮魚味。
鮮脆鯇骨腩
好鮮脆，只係有好多骨。
潮汕蝦丸，墨魚丸，魷魚丸
細細粒，非常彈牙，好新鮮。
鮮雞件
今次無食到。
自助配料吧好衞生，全部用蓋蓋住或者放係雪櫃。 選擇有好多，一般既配料如龍蝦丸，午餐肉，蟹柳，香菇貢丸，牛筋丸，芥末貢丸，脆皮芝士腸，魚腐，魚片頭等等都有，特別d有包心蟹籽丸，黑松露豬肉丸，包心丸，黃金魚蛋，麻辣牛肉丸。餃類都有幾款，包括魚皮餃，韮菜餃，水餃，鮮蝦雲吞。較為特別嘅有鵝腸，鴨血。
青菜有4款，分別係娃娃菜，生菜，白菜同菜心，質素唔錯。其他蔬菜仲有淮山，萵苣，薯粉，南瓜片，冬菇，粟米，金菇，冬瓜，秀珍菇，山根，粉絲，木耳，蓮藕，響鈴等。
主食有稻庭烏冬同出前一丁。值得一提係連炸魚皮都有，香脆好味。醬料自己係自助醬料吧攞。
飲品櫃有3大個，有好多選擇。飲品有自家製涼茶包括竹蔗茅根，冷泡茶，道地包裝飲品，韓國樂天罐裝飲品，罐裝汽水等等。
欣賞佢既自家製竹蔗茅根，少少甜味，感覺天然，係好清甜既蔗汁味。
今餐肉類質素進步咗，好多款都好味。落單後上菜時間都好快，都冇漏單，所以兩個鐘實夠食飽。服務員巡邏頻密，收碟極快。座位新淨舒適，我地兩個人霸左個四人卡位。計落價錢唔算貴。
