Be B燒 (Closed)

涼住冷氣食串燒✨ 雖然而家已經係十二月尾但天氣仲係好熱，成廿六度可以短衫短褲出街🙄 成日覺得食串燒BBQ呢家嘢坐響街邊食最開心，但天氣咁熱點都係涼住冷氣好，而呢間啲位幾闊落，坐得又幾舒服下，人流又唔算多，同朋友一路坐底咬下串燒飲下嘢一路傾計打下牙骹咁都幾過癮。

嘢食款式同出面其他串燒舖差唔多，不過勝在款式多，紅肉海鮮蔬菜樣樣齊，叫咗八樣嘢，紅肉類有安格斯牛柳粒、厚切牛脷扒同豬仔髀，肉質唔算好嫩滑但勝在燒得夠惹味，而且調味都幾有辣勁。

蔬菜類就叫咗pizza茄子，燒茄子就見得多，加入Pizza風味就第一次見，芝士粟米燈籠椒，有哂拉芝咁係幾鹹癮，不過整體感覺唔太夾，如果轉用帶鹹味重啲嘅芝士會更好。

而最正係海鮮類，叫咗生蠔同扇貝，同樣係用蒜蓉蒸，前者蒸完仲係幾大隻，咬落仲有好多汁，而扇貝都係好大隻，啖啖肉又索哂啲汁，肉嫩蒸得剛剛好。最後係佐酒小食，雞皮串夠脆口惹味，雞泡魚乾好𡁻口，送酒一流。