香港地要食到又平又多既海膽唔易，每次一口痕想食海膽，就會諗起「爆丼屋」，呢個份量的確對得起呢個價錢（$284），但質素就⋯⋯⋯每次食完都覺得好伏。（但一口痕又會唔記得左！）
食過咁多次，佢地海膽份量雖然多，但質素依然一樣差。雖然未至於腥，但食落口係無味！加上放左一陣，海膽已經變到一patpat、溶溶地咁。明明食落口係海膽既軟綿綿質感，但點解每啖都食唔到海膽味？花左咁既價錢，真係覺得好伏！寧願用呢個價錢出去食50蚊一舊高質海膽軍艦/手卷都冇咁嬲
加上我今日自己一個去食，員工當單丁客好似人球咁：我一入坐落完order冇耐，就比店員要求我換位，冇問題；換左位，都差唔多食哂，淨返一兩啖果陣，又有店員再黎問我介唔介意調位！
我明明只淨返DD就食完，食緊飯都仲要人換位？明白餐廳想做多幾轉生意，但客人都已經開始食緊飯，呢個時候叫人調位我覺得都唔太尊重。自開業以黎，已經比左好多次機會、幫襯過好多次爆丼屋，今次真係死心。最後特登打呢篇食評提醒自己以後都唔好再黎
