今日出將軍澳搵老公食飯，順便行激安殿堂，行完就係附近食飯，行下行下見到有間試業中的韓國cafe，又係時候懷緬下韓國，於是入去解下對韓國的相思之苦~
雖然已經2：30，但都好爆場，好彩唔洗等位～以木系為主，靠門邊有兩枱鞦韆椅子，一面塗鴉牆作點綴。餐廳有主食，甜品同咖啡飲品。我哋揀咗一個拌飯丶一個芝士蕃茄烏冬同埋肉眼扒薯菜~
先嚟係青梅照燒腩肉拌飯配糖心蛋，腩肉肥瘦均勻，爽口不肥膩。將糖心蛋篤穿流出蛋汁再撈埋啲紫菜腩肉，配埋燒汁，甜甜地又帶蛋香~
隨之而來就係香煎肉眼配薯菜，肉眼剛熟牛香濃郁，薯條份量多，又大條又脆口，食埋沙律菜剛好解膩。
最後炸雞芝士蕃茄濃汁撈稻亭烏冬，剛焗好熱辣辣，炸雞炸得香脆又大件，芝士份量澎湃，撈起有拉絲，烏冬爽滑索滿濃厚蕃茄汁，開胃香甜，與芝士係天作之合。蕃茄控不能錯過~
飲品跟餐可選＄30以內飲品，亦可補差價換其他飲品，我補錢叫咗杯士多啤梨奶昔雪山，造型係一個粉紅色小雪山，滿滿士多啤梨味同芝士奶蓋，又好睇又好飲
最後追加咗個韓國米酒意式芝士蛋糕，有別方間的意式芝士蛋糕，用手指餅做餅底，酒味濃郁，甘香軟滑。叫其他甜品仲有8折優惠添~
除咗午／晚市外，佢地仲有早餐提供，甜品同咖啡也好吸引，下次可以再試其他款
