餐廳大部分係梳化位，座位闊落坐得舒服。
餐牌上選擇好多，海南雞、喇沙同肉骨茶都係招牌菜。
招牌海南雞飯可以配迷你海鮮喇沙，一次過試晒兩款招牌菜！
無骨海南雞嫩滑有雞味，中間有啫喱好正
三色醬係新加坡正宗口味，尤其鍾意帶果酸味但唔太辣嘅辣椒醬
雞油飯粒粒分明帶點薑味，唔會太油膩
拼海南雞飯嘅迷你版海鮮喇沙雖然細細碗，但都有齊蝦、豆卜、魚片同鴨蛋。喇沙湯底充滿椰香，米粉同米線吸收晒惹味辣湯
炒貴刁係河粉加油麵，好特別。配料好多非常足料，有蝦仁、臘腸、魚餅等等。味道鹹甜帶點辣，好有鑊氣好惹味
沙嗲拼盤有豬肉同雞肉，每串份量唔細，燒得香口唔會過乾。沙嗲醬香濃惹味，花生味突出帶點甜味
蔥油拍酥餅配咖喱汁，蔥油酥餅煎得乾身酥脆唔會太油膩，配埋偏甜嘅咖喱汁好好味
總括嚟講食物質素高，招牌海南雞同喇沙果然係好好味，可以話係必食！餐廳環境幾好，座位闊落坐得舒服，其中幾張枱仲可以睇到海景，人均二百幾蚊價錢合理。
