佢地嘅Lunch Set基本上都有晒佢地大部份嘅招牌菜，仲包左咖啡茶，亦可以加錢轉其他特飲，另外逢一至五，仲可以加$15食埋佢地個椰子雪糕。
文華海南雞飯($133) - 我地加左$10要脾，海南雞本身已經去晒骨，啖啖肉方便食，雞肉真係好滑，肥瘦適中，我自己就鍾意蘸黑豉酒食。
1
油飯好香，而且粒粒分明，唔會煮得太腍太黏。
清湯入面有豆腐。
白胡椒肉骨茶配白飯($122) - 肉骨茶可以跟白飯或者麵線，佢另外仲有油炸鬼。
肉骨茶胡椒味適中，唔會太辣，入面都幾多豆卜同排骨，排骨煲到好腍，骨肉好易分開，肉亦唔會太鞋。
1
玫瑰咖啡 & 四季柑檸檬薄荷梳打(跟餐加$18) - 玫瑰咖啡上面有幾塊玫瑰花瓣做點綴，飲落其實冇乜玫瑰花味，不過咖啡都幾香唔會過苦。四季柑檸檬薄荷梳打味道就酸酸甜甜好清新。
椰子雪糕(跟餐$15/球, $28/2球) - 如果仲有肚量，一定要食埋哩個椰子雪糕，因為真係好香椰子味，而且仲食倒椰絲喺入面，一球都幾大球。
總結，海南雞飯真係冇令人失望，雖然價錢比出面嘅雞飯貴，不過份量都好足，絕對交足功課，另外椰子雪糕都係必食。
