一於試試佢係咪得個樣靚～
位置唔算方便，喺內街中央，由奧運站行去都要20分鐘左右。
下午5:00左右到，店內竟然冇客😶 但咁就方便影相好多，而且感覺舒適啲冇咁擠逼。
不過接待我哋嘅店員俾人感覺都有啲怠慢，冇咩反應同交流。
睇完一輪menu, 覺得選擇都算多，但唔太韓式；由pasta、炸雞、咖啡到IPA都有。
點餐後會附送湯同前菜。
年糕大豆湯好令人失望，因為係溫溫凍凍的⋯年糕夠軟但癡埋一舊⋯
前菜就泡菜同醃蘿蔔，份量超小。
《芝士炸雞 (6件) $108》
6件當中有兩件係雞翼。一上檯芝士味好香！面頭除咗芝士醬，亦有大量芝士粉。但出奇嘅係作竟然唔係韓色炸皮，反而係平滑薄脆嗰種，同預期好大出入，話曬係韓國餐廳。
不過炸得夠脆嘅，雞件都大件厚肉
肉質唔係滑但都ok唔太鞋，中規中矩。
《軟殼蟹忌廉汁意粉 $98》
醬汁淡，冇忌廉香；意粉亦係一般般好發好淋嗰種。
但軟殻蟹好大隻，肉多，攞番少少分。
超多肉～係嫌佢太有海水味，咬落會唧海水。
《香蕉拿鐵 $45》
呢個配搭幾新鮮又好味！香蕉甜味完美咁補償咖啡嘅苦，底部亦有好多香蕉肉。
但咖啡係普通茶餐廳感覺cheap cheap味，有啲可惜。
《IPA是L但 $48》
最特別都係有得飲IPA! 呢款個名夠曬特別，飲落一啲都唔是但，好甘醇清香，微甜易入口！
整體嚟講，呢間餐廳一啲都唔韓式，食物質素中中等等。
呢個價位襯呢種質素，無疑係定價過高的。
花花天海影落都算打得落卡，但就唔值呢個價。
不過呢頭都算少 少女風 打卡餐廳，經開呢度又咁啱少女心爆發，就可以考慮下呢度～
