咩叫舊式/傳統？就係流水式叫餐 - 先點麵底，看睇當日有咩餸，睇啱就點，最後俾錢。一條隊由頭到尾，點餐＞俾錢＞返埋位。
店員，師傅都係有返咁上下資歷，感覺好穩陣😁。之前食過一次，今日再幫襯。
價錢方面，每款餸由$6-$13不等，麵底就$9。
今日叫咗豬皮、魚蛋、蘿蔔、煎釀三寶（$10/4件 - 豆腐、紅腸、炸魚蛋），配油麵 $45。
魚蛋（辣咖喱） - 口感好實在，似陳皮魚蛋放大版，唔會又林又鬆。咖喱好入味，小辣。
豬皮 - 用鹵水鹵過好入味，微微辣。
蘿蔔 - 好甜又係好入味，份量都幾多。
雞翼尖 - 上次食過，鹵得好入味，必點。
煎釀三寶 - 釀豆腐薄薄地，唔油，配麵幾夾。魚蛋就比較鬆軟，可能溝得粉多啦！冇咖喱魚蛋咁實在。紅腸就最平凡。下次應該點釀豆腐算喇。
整體感覺係兒時嘅味道，價格實惠，多點幾個餸都唔肉赤。最重要嘅係好味！👍👍👍
