由於我地一早book左枱，服務員帶我地去到一張已預留既枱，可能平日既關係，餐館當時並無太多的客人，環境不錯，有一間小獨立的空間，接待我地的人係真‧泰國人，我地四個當時都好肚餓，所以快手就點好食物了。
首先送到的是三款不同口味的泰式特飲，我地分別點了芒果冰沙、菠蘿冰沙和椰青冰沙，芒果冰沙我和朋友們都一致認為不過不失；菠蘿冰沙還好，菠蘿味香，有果蓉，入口感覺非常fresh；最後椰青冰沙係本人極推介，雖然價錢並不算便宜($55)，但即使我個人本身不太喜歡椰青味，我都愛上呢個椰青冰沙，喜歡椰青的人必定要試，質感同味道似牛奶椰青沙冰，有雪糕的口感，非常特別！
先來的是被列為沙拉的肉碎生菜包豬，個人認為呢個生菜包非常岩自己口味，我本身對辣麻麻地，平時食生菜包我都是一塊起兩塊止，但今次豬肉非常香口，香料的辣非常刺激，會令你想繼續食，非常特別。
之後來的是炭燒豬頸肉，基本上每次食泰國菜，豬頸肉都是必點的，豬頸肉唔肥唔瘦，入口超香，超好味既係佢既醬料，唔算辣，但非常好味
必食推介之一。
之後仲有一個卷，香芒牛油果軟殼蟹卷，我本身非常喜歡食米卷，呢個卷材料係吸引，芒果、軟殼蟹，米紙薄其實唔錯，但整體味道一般，普普通通。
是日我地覺得呢個係麻麻地，我地幾個本身對貴妃苗有期望，呢個貴妃苗清淡，如果喜歡清淡泰菜的人應該會喜歡呢個，但我地比較喜歡口味刺激小小，下次應該會叫返馬拉盞炒通菜，應該岩啲我地口味。
最後就係我地個泰式蝦炒金邊粉，上面有一層薄薄既格仔蛋，蝦夠爽，味道酸酸甜甜，岩岩好，唔會太酸唔會太甜，值得一試，反而如果下次再黎我地想試金邊粉炒海鮮。
食左5個餸我地覺得未夠喉，決定叫多個芒果糯米飯，呢個芒果糯米飯好好味
，佢有齊黑白糯米，超香，芒果唔算好甜，好彩有糯米同個汁搭救，真係好好味，我地4個人share1個岩岩好。
整體而言，呢間泰菜係真‧泰國人經營，泰菜味道算正宗，食物質素真係有泰國正宗味道，價錢唔算太貴，灣仔區呢個價格算可以。個人極推介肉碎生菜包豬同椰子沙冰，真係好好味！
