💭大埔超級城C區食肆雲集，最近進駐了一間主打泰國船麵的「船皇」，於是今日特別約埋朋友一齊來試一試。
◾️船皇餐牌主要有湯麵和撈麵，仲有飯類、串燒及小食，都有好多選擇。麵底可以揀蛋麵、米粉、河粉或金邊粉，而味道又可揀大辣、小辣及唔辣，總之就按個人喜好，自己話晒事。
◾️採自助形式，先到收銀處點餐付款，然後找個位子坐下，食物弄好後再出去取，而弄餐都算快，但因我哋叫了多款串燒小食，所以要出多幾次攞食物，整體上都算方便。
🥢船皇湯麵 $58
船皇湯麵揀了金邊粉，湯底唔辣、鮮甜濃郁，不會過鹹，味道剛好。金邊粉軟滑幼細、索湯汁，十分入味。餸料有牛腩、牛肉片、牛肉丸、雞絲、鹵水雞翼、豬肉片和豬肉丸，牛腩腍身、肉丸彈牙，炸豬皮脆卜卜、唔油膩，總共八款，可謂包羅萬有，非常豐富，簡直是大滿足。
🥢香葉肉碎飯 $58
朋友揀了限定供應的「香葉肉碎飯」，肉碎經乾葱、魚露爆過，又香又惹味，肥瘦適中，加埋太陽蛋的蛋汁，撈飯食，正！
🥢泰妹雞翼 $22
5件單骨雞翼，炸得非常香脆，味道帶點辣，很惹味，值得推介。
🥢串燒魷魚鬚 $15
沙嗲醬魷魚鬚惹味彈牙，一串有兩大條，幾抵食。
🥢串燒魚餅 $15
點了兩客魚餅，有泰式辣醬和泰式燒烤醬，兩款味道各有特色，朋友就話比較喜歡燒烤醬味喎。
🥢串燒牛舌 $15
牛舌頗有口感，不會太薄，爽口有嚼勁、唔韌，味道不錯。
🥢串燒菠蘿 $12
味道鮮甜多汁，菠蘿酵素能幫助消化，吃後感覺很舒服。
🍹凍柚子檸檬梳打 （跟餐 $15）
單叫$22，跟餐只需加$15，以泰式銀碗盛載飲品，頗有泰國風情，味道酸酸甜甜、很開胃，而且有頗多柚子肉，清香好味。
🍹泰式龍眼冰 （跟餐 $15）
冰凍清甜，啖啖龍眼肉，飯後吃，感覺很清爽。
💭整體來講，船麵配搭頗多樣化，食物質素及性價比高，個人認為絕對是可以再安哥的心水食店之一。
