最近試咗呢間新開嘅餐廳，齋睇個名就知道係主打泰國同越南菜，真係一餐飯滿足你兩種口味。
入到舖頭見到佢啲新裝修都幾骨子，以柔和嘅木系顏色作為主調令到氛圍都幾舒適，搭配一啲紅紅綠綠嘅壁畫作為點綴，都幾有越南南洋風情。
講返重點，即係食物同埋味道。我哋一行六人分別點左以下菜式：
牛油果軟殼蟹卷🥑
越式火車頭🚂
越式生牛肉湯河粉🍜
鮮蝦炒金邊枌🦐
沙嗲燒雞串🐓
黃咖喱大頭蝦🦐
牛油果軟殼蟹卷🥑
個軟殼蟹味道係好嘅、口感係脆嘅，但係就稍嫌太過搶風頭，令到牛油果嘅口感同味道都被比下去。當然，對軟殼蟹有偏好嘅人而言，呢味餸菜你絕對會鍾意！但如果講一道餸菜嘅平衡性而言，牛油果就有少少慘慘豬啦。
越式火車頭🚂 + 越式生牛肉湯河粉🍜
兩個湯麵撈埋一齊寫，因為佢哋個湯實在好濃～郁～鮮～甜👏🏽真係一啖接一啖咁飲。而且個面底份量相當大碗，作為一個麻甩佬都食唔晒。至於啲肉啊、丸啊之類嘅配菜都唔Hea，擺落口第一啖就食得出唔係啲下欄貨、不知名丸、雪藏味肉。
鮮蝦炒金邊枌🦐
酸酸甜甜幾開胃咁囉，中規中矩唔差嘅，但亦都冇咩意外同驚喜。
沙嗲燒雞串🐓
呢個睇落普通嘅雞肉串，真係估佢唔到咁有驚喜‼️唔怪得知一坐低點菜，啲侍應哥哥姐姐就推介，話係招牌菜之一。果然係越普通嘅嘢，要做得好食，就越考功架。點會諗到咁普通嘅雞肉串竟然可以燒完之後啲肉質仲係咁嫩滑多汁，要做到呢個水準，真係慢工出細貨先至做到，香港啲速食文化來講真係難能可貴。至於佢個沙嗲汁，應該好快係啲「沙嗲關注組」出現。
黃咖喱大頭蝦🦐
蝦嘅份量同埋size 相當充足，食落真係啖啖肉。不過美中不足嘅係，啲咖喱汁滲入唔到蝦肉入邊。撇除呢個問題， 個黃咖喱其實好惹味開胃，所以我哋都即刻加多個印度薄餅點咖喱汁嚟食，食到個個舔舔脷，摸着個大肚腩離開。
