La Mer Restaurant & Lounge (Closed)

趁聖誕前同女友歎番個法式下午茶，傾下計，休閒一番。 因為要買聖誕禮物，所以黎左尖沙咀既<< La Mer Restaurant & Lounge >>。 門口搵左黃長興做宣傳，都好吸睛下。 餐廳裝修都好古典高雅，好有法國風。 我地兩個人，當然點個for two既tea set. 當個tea set黎到時，女友真係嘩左一聲。 仲有鬆餅，口感剛剛好，唔會太甜，加上果jam就更配合。至於個塔，當然由上而下咁食。最上層係煙三文魚牛角包及牛油果配帶子。牛角包係咸食，鬆軟又有口感，配上煙三文魚超夾。牛油果蓉夠鮮甜美味，加上帶子味道更豐富。 第二層係：吞拿魚蕃茄串及芒果呍呢拿慕絲。吞拿魚粒外面配有黑椒粉，令到咸咸地之餘又辣辣地。 而芒果慕絲，有陣陣既芒果味及呍呢拿慕絲入口香滑，外表仲好吸睛。 最底一層係朱古力榛子、紅莓馬卡龍等。我個人就鐘意食朱古力榛子，除左有脆卜卜的榛子，入口仲好滑好CREAMY，好重朱古力味。另外紅莓馬卡龍甜度剛剛好，好易入口。 跟餐仲有兩杯野飲，除左女朋友揀左熱飲伯爵茶，未飲都聞到香味。我就揀左杯凍latte，享受下。