不用取票，七點幾嚟到門外排隊大概7-9人，店員先比餐牌同落單紙叫你落單先。店員又問坐唔坐吧檯？佢話隻船駛走左有景睇～其實坐邊冇所謂，大概5分鐘就安排入座。
入到嚟，環境裝修簡約舒適，其中一面水泥牆寫上發光嘅大字，望落都幾特別。店內係開放式廚房，有興趣嘅朋友可以坐近師傅睇佢地製作拉麵，即叫即煮現場感十足。
餐廳設大大塊玻璃窗望住海景歎沾麵。檯上放有檸檬水，好冰呀❄️仲有貼心安排放隨身物嘅籃，吧檯的高椅子下方有個籃比你放。
味玉濃厚魚介沾麵
店員提醒食麵的最佳時間係15分鐘。其實我解讀做「15分鐘咋，食完好還檯喇」哈哈！
沾麵麵條粗身好似烏冬咁。味玉 (溏心蛋) 咬第一啖係凍嘅。雞肉叉燒和豚肉叉燒各一塊 (豚肉叉燒好味啲) 試完原味湯汁加左少少辣粉再試，味道分別不大，可能啲魚介湯汁太濃蓋過辣粉。
上檯時店員會溫馨教你把麵浸入湯底2-3秒，等條麵掛湯汁然後食。食完沾麵後可以加入清湯直接飲埋整個湯底。
overall, 名氣雖大環境雖靚，但日本食唔駛¥1000香港食要百幾蚊，真係思鄉嘅朋友先嚟食啦～
