呢一間「上海嘢」之前搭車經過見到門面裝修、加埋燈光好有上海灘嘅feel😆，好難唔俾佢哋吸引望吓佢哋門口個餐牌，見到價錢咁抵食就入去睇清楚先。
入到去雖然不設雅座，但係等外賣客人都頗多，餐牌食物種類分為點心、湯麵、冷盤、飲品、甜品及廚部推介，價錢非常經濟，一次過order咗8款美食外賣返屋企同家人開心share先乙
平時食上海嘢一定要叫呢個招牌小食 - 雞絲粉皮麻醬，鍾意佢有滿滿而濃郁嘅麻醬，撈埋粉皮同埋雞絲一齊食，帶有黏口香滑嘅口感，加埋青瓜絲，啖啖 Creamy又爽口。
無辣不歡嘅家人最鍾意飲酸辣湯，估唔到酸梅湯外賣都咁大碗而且好足料，就咁舀一羹已經見到有豆腐、金菇等豐富湯料，酸酸美味好開胃呀。
仲有要試吓呢度嘅鮮肉鍋貼，一次過order左六隻，每一隻都大大隻脹卜卜，鍋貼底煎成金黃色，再點一點醬汁令鮮味更為突出，咬一啖餡料非常豐富仲有好Juicy嘅肉汁流出嚟。
仲有食肉獸最鍾意嘅招牌豬扒 ，有個手板咁大隻，廚師非常細心切開一件件，豬肉肉質頗為鮮嫩，而且好香口。
食晚飯梗係要有飯落肚，這一款招牌上海鹹肉菜飯也是必點之選，配埋豬扒一齊食簡直一流。
除此之外，上海素菜包、紅燒牛肉麵及流沙煎堆質素也不錯，我哋一家人都食到非常飽肚非常滿足，最重要係性價比好高呀。
