大喜屋

Open Now

Now Closed

今日去沙田 IKEA 買完嘢突然之間好想食放題，諗起之前同事介紹嘅呢一間大喜屋，佢話個性價比相當高，就過嚟試下，餐廳環境都幾高檔，除咗基本嘅放題美食之外，仲有清酒梅酒任飲，質素重相當不俗添。刺身拼盤，我哋揀咗三文魚、希靈魚、油甘魚、劍魚腩、帶子、赤貝、甜蝦同埋玻璃蝦，全部刺身都相當新鮮，其中帶子、赤貝入口鮮甜，厚切三文魚十分肥美，有唔少部份都係腩位嚟添。黑松露玻璃蝦壽司，作為黑松露控嘅我又點會錯過呢一個壽司呢，玻璃蝦爽口彈牙，加上黑松露嘅香氣，係非一般咁滋味。火炙三文魚皮壽司，喺餐牌見到呢一樣咁特別嘅壽司即刻嗌嚟試下，魚皮連帶少少魚肉，口感嫩滑，魚皮被火炙過後豐富嘅油脂被悉數迫出，加上燒得卜卜脆既魚皮，值得一再 encore。串燒鰻魚，鰻魚相信係除左刺身之外，另一樣返本嘅食物，呢度嘅鰻魚肉身脹卜卜，口感同味道都一流。燒羊架，羊架燒得夠香，入口未算好騷，但係咬深少少嘅連膏位置，口腔即刻充滿著濃濃嘅羊騷味，羊肉嫩滑，豐富既油脂令到口感更加豐腴，鍾意食羊嘅朋友唔可以錯過。。鹽燒雞翼，廚師將雞翼嘅外皮燒到脆卜卜，入口相當乾身，明顯所有多餘嘅油份都已經被瓊乾，只係落少少海鹽嚟調味，已經夠哂好食。