Ben哥米線 (Closed)

作為米線愛好者，見到旺中地下新開左一間Ben哥米線，成日心思思想試下。上網一睇，原來舖頭之前開喺新蒲崗，而家搬咗舖去旺角。而佢哋係觀塘海濱道都有一間分店。今日咁啱下午茶時間係旺角搵野食，見佢Ben 哥有做下午茶餐優惠，包冷熱飲品，Basic小窩米線加兩款$7餸，都係$42，所以決定試試佢。叫左一碗沙嗲豬骨湯米線，配冰糖蘿蔔同腩肉。沙嗲湯有驚喜，香濃得黎唔會太鹹，帶少少辣，幾惹味。蘿蔔炆得好腍，冇渣，帶少少清甜，十分推薦。腩肉都好大塊，啖啖肉。另一碗叫左蕃茄酸辣湯配金菇金錢𦟌，小辣。碗麵一到，見到個湯底即刻有啲後悔，因為自己唔算好食得辣。完全低估咗米線小辣嘅程度🫣 湯底有用新鮮蕃茄粒調配，但係辣味較重，反而食唔到酸辣。同埋嗰種辣係馬上上頭嘅辣，食到半路已經出晒汗🥹 食辣嘅朋友應該會欣賞，但唔食得辣嘅朋友就千祈要留意！ 本身配料想試蝦餅，但係賣晒。所以就揀咗都比較受歡迎嘅金錢𦟌。金錢𦟌份量普通，同埋都比較零碎，可咁啱咁蹺得返貨尾🤔整體米線份量中等，麵質偏淋，湯底就有驚喜，偏濃味，食完都會有少少口渴。鍾意食米線嘅朋友都值得一試。