大街小館 (Closed)

好耐好耐好耐好耐冇食過中式甜品，呢一日返工畀阿姐激到發癲，放工決定行落佐敦，食一個甜品去安慰返自己嘅心靈。隨意揀咗呢間大街小館，因為貪佢燈光通明，感覺唔污糟🧐.呢間甜品小店除咗典型嘅中式甜品，紅豆沙，綠豆沙，西米露有供應之外，仲有新派嘅甜品，例如綿綿冰，🥭芒果河粉...... 而不得不提一定係佢嘅燉椰皇。平時好鍾意椰子味，貪佢夠香之餘仲好滑，淨係燉椰皇都令我花多眼亂😁從來都淨係聽過桃膠點點點有營養，但係未試過，所以今次就試咗佢個✔️椰皇蛋白燉桃膠($52)上桌嘅時候熱乎乎，仲有啲煙升起，桃膠望一望份量都唔少，而且仲混合咗啲西米加埋糯米丸子，椰汁加左少少牛奶浸住，至於食咗一半就發現下面原來仲有燉咗嘅蛋白，成個甜品嘅口感係好香好滑，食完會飽肚👍.同樣養生嘅朋友揀咗✔️紅棗桂圓雪燕燉蘋果($46)。我嚐咗一口，甜到啱啱好，佢個糖水除咗甜，仲散發出蘋果嘅香味。蘋果中間加入咗紅棗，紅棗嘅天然甜亦都發揮咗作用。