Under Vacuum The Steak (Closed)

好耐之前上網睇過呢間餐廳嘅介紹，半年前試過打電話嚟滿座到訂都冇得訂，所以放棄咗冇食。今日突然醒起，諗住試吓walk-in，竟然有位。

餐廳裝修雅致，以呢個地點來講，算好有心思。餐廳盡頭嘅角落頭掛咗一幅畫，加埋柔和嘅燈光，驟眼以為自己坐係高級餐廳度食緊野。可惜抽風系統嚴重不足，坐落5分鐘發現油煙味攻入室內久久不散，本身鼻敏感嘅我漸感不適，唯有掉位出返大門口坐。

嚟到呢度，梗係要試吓啲牛扒

＄98 ,以價錢來講，算幾吸引。不過唔跟湯，淨係跟可樂
砌開牛扒多汁，肉質睇落去好靚，點知食落十分有咬口，好似香口膠咁樣，食到個口好攰，不過牛肉味幾好
薯蓉真係好一般，乾，鞋口，唔建議食
最差嘅係塊多士，望落已經好燶，點知反轉後面更燶！可能係得一個廚師，兼顧唔到咁多野

＄68 ,炸魚薯條
總係覺得呢度啲嘢揸炸得太燶，舊魚岩岩炸起係幾好食，不過啲薯條好明顯係炸定，比較乾
加左＄30跟餐轉左杯接目骨荔枝梳打，味道係荔枝梳打，冇驚喜

餐廳自助形式，不設帶位，好似快餐店咁自己出去落單拎餐具。上菜速度極慢（超過20分鐘一道菜），我見隔離枱食完第一碟，第二碟先上。食物質素一般。論裝修格調我覺得係文青打卡好去處，但係唔多適合我呢啲為咗搵食嘅客人。所以我知點解今日唔使等位。