良辰吉時 (Closed)

舊年年底去台中旅遊，就已經一街都係黑糖飲料，有幾間當時好多人打卡，原本書籤左納豆的店良辰吉時想試，依著開門時間到店，但竟然未開…嬲嬲地唔等，事隔半年喺荃灣開店，黎緊喺元朗亦有。最初開都有好長人龍，基於唔係必定要試，唔想花時間排隊，以免同期望有落差。之前睇過無數踩到落地底嘅評語，不過都要試過先知啱唔啱自己。是日陪另一半喺附近睇完醫生，即管行過黎睇下，可能因為係平日再加上落狗屎，完全冇其他客人，輕鬆試到餐牌分原茶、鮮果飲、鮮奶、果昔、奶茶等，定價$15-36，分中/大杯裝。大部分可選甜度、冰度。配料有芋頭、多款口味珍珠。黑糖鮮奶未有於餐牌上顯示，唔明用意，甜冰固定。啵爆黑糖厚鮮奶 $36以黑糖產品以言，暫時試過最貴係呢杯，先唔敢味道，定價肯定進取，難怪有咁多人排個幾兩粒鐘後會表示唔值。飲品到手時非常熱，黑糖佈滿杯邊，算係幾完整，仲好似故意整污糟埋杯蓋般。面頭有一層黑糖奶霜、黑糖粉，按建議先飲呢層，其實冇咩特別。雖然係明治鮮奶，但唔覺得特別濃，可能因為呢度用嘅碎冰，融化較快，令奶冇咁濃郁，仲一路食珍珠一路食到冰碎黑糖合格，即使直接飲我都唔覺得甜到嘔，當然啦，接唔接受都係主觀感受，皆因我係螞蟻