呢度餐牌除左招牌菜式吉列牛同忌廉烏冬之外，都有釜飯，Shabu-Shabu，冷麵，炒飯，韓式牛肉飯，主食，小食，沙律，亦都有午餐，套餐，同各樣飲品。
吉列牛定食 $148 另加一
吉列牛係必食之選。除左主角吉列牛之外，定食包兩款前菜，分別係一粒車厘茄切開兩半加左胡麻醬同一細磚加左胡麻醬嘅豆腐。仲跟一碗白飯，上面撒滿飯素，同一碗味噌湯。
吉列牛一客13件，外皮香脆而入面嘅牛肉就三成熟左右，等你自己喺個爐仔上面烤到自己鍾意嘅熟度先入口。個人覺得完全唔燒就咁食其實仲嫩口。
跟吉列牛有蒜蓉mayo同甜酸燒肉汁等你點，仲有wasabi，個人最鍾意蒜蓉mayo，因爲令到塊牛更香滑。伴碟有少量胡麻醬梛菜絲沙律。
咖哩忌廉烏冬 $78 另加一
招牌咖哩忌廉烏冬係另一必食之選。大碗烏冬上面滿佈白色忌廉同少少蔥花。咖哩加忌廉好滑又唔太膩，味道其實係日式咖哩既甜甜地，好好食。餐牌寫明小辣，但係我覺得基本上完全唔辣。烏冬係粗身而有少少嚼勁同勁滑，好好味。其他配料有唔少牛肉粒，都算幾腍吓。另外仲有少少西蘭花同洋蔥。我地都唔停口係咁食。最後我哋將吉列牛定食成碗飯倒落咖喱汁度清埋個咖喱汁。
日式牛里脊炒飯配流心蛋 $72 另加一
日式牛里脊炒飯配流心蛋都係堅好味。牛里脊份量唔少，味道好好而質感超稔。其他配料有好多菇片，洋蔥片，蔥花，白芝麻粒，口感豐富。炒飯唔係普通炒飯，好濕潤，而個汁甜甜哋，非常好食。整穿隻流心蛋將啲蛋汁撈埋啲飯一齊食仲正！
牛油蜜糖單骨雞翼 $65 另加一
叫左一客小食分享。係三款口味既單骨雞翼揀左牛油蜜糖口味。單骨雞翼一客五隻全部開一半易食啲，蜜糖汁勁豐富，而雞皮仲係脆嘅，上面仲灑上白芝麻粒，伴碟有一細塊檸檬。
兩個人清哂所有野，大滿足！上菜好快，坐低半個鐘多少少就食飽走人。平日一點三左右到，唔洗等位，不過都好多食客。座位可以，不過如果張枱大少少就好d。
