Yu Zhen Wei

位於中環嘅御珍味，係唔少上班族推介嘅隱世寶藏！御珍味係一間以東北菜為主嘅餐廳，餐廳雖然係小店，但店主用心製作唔同好味嘅手工餃子，啱晒唔鍾意食粥粉麵飯嘅你，將水餃當正餐。除咗水餃，仲有各種特色嘅東北菜式，同樣令人驚喜。

手工涼皮
御珍味嘅涼皮每日新鮮製作，所以口感特別爽彈，掛上同樣自家調製嘅辣汁，令清涼嘅麵條喺麻辣之中帶點微微嘅辛香。

餛飩
遇着繁忙時間，就會見到師傳不停咁手工製作餛飩，保證新鮮好味。我哋揀咗豬肉蝦蟹仔餛飩，餛飩皮做得非常簿，配料有豬肉、蝦同埋蟹仔，豬肉增添餛飩嘅肉汁，而蝦蟹就擔當鮮味嘅來源，認真做到皮薄餡靚。

肉夾饃
講到東北小食又點少得肉夾饃呢！酥脆嘅圓形外層饃皮，配上內層則軟腍而多汁嘅五花肉，肉質豐富，而味道充滿濃厚嘅鹹香味。

豬肉酸菜包
微酸嘅酸菜恰好中和咗豬肉嘅油膩感，仲突出咗豬肉嘅鮮嫩同埋肉香，軟綿綿嘅肉包外皮，亦因為吸收咗豬肉同埋酸菜嘅味道而變得層次豐富。